Qırımtatar yazıcıları birligine yañı azalar qabul olundı

Qırım Gazeti

 
İyün 15 künü Qırımtatar yazıcıları birligine yañı azalar qabul olundı. Yazıcılar birliginiñ Ablâziz Veliyevden (reis), Rustem Muyedinovdan, Üriye Edemovadan, Şeryan Aliden, Safter Nagayevden (öz fikirlerini yazılı şekilde yolladı), Dilâver Osmandan (kâtip) ibaret qabul komissiyası Yazıcılar birligine kirmek içün ariza bergen Pevat Aciredinovnıñ (belli jurnalist, şair), Vasfiye Qıpçaqovanıñ (şaire), Şevket Yunusovnıñ (edebiyatşınas), Gülnara Üseinovanıñ (nesirci) ve Temur Üseinovnıñ (edebiyatşınas) arizalarını ve diger vesiqalarını baqıp çıqıp, muzakere etip, aşağıdaki qararğa keldi.
 
Komissiya, ariza bergenlerniñ episiniñ vesiqaları Yazıcılar birligine qabul etüv Nizamnamesiniñ talaplarına tolusınen cevap bergenlerini, olar episi özleriniñ bediiy eserlerinden ve edebiyatşınaslıq boyunca tetqiqatlarından eñ azdan ekişer ve atta üçer-dörter kitap çıqarğanlarını qayd eterek, yuqarıda adları añılğan icatkârlarnıñ episini Qırımtatar yazıcıları birligine aza olaraq qabul etti ve bir ağızdan qabul olunğan bu qararnı tasdiqlamaq içün Qırımtatar yazıcıları birliginiñ idaresine taqdim etti.
 
Erkânında Riza Fazıl (reis), Rustem Muyedinov, Ablâziz Veliyev, Şeryan Ali, Üriye Edemova, Dilâver Osman (kâtip) bulunğan Qırımtatar yazıcıları birliginiñ idaresi özüniñ aynı şu künü ötkergen me-clisinde Qabul komissiyasınıñ qararına bazanaraq em de namzetlerniñ er birine sualler berip, meseleniñ ayrı taraflarını açıqlayaraq, açıq rey ile olarnıñ azalığını tasdiqladı.
 
Böylelikle, Pevat Aciredinov, Gülnara Üseinova, Temur Üseinov, Şevket Yunusov ve Vasfiye Qıpçaqova Qırımtatar yazıcıları birliginiñ azası oldılar. Olarnı bu vaqia ile hayırlaymız ve daa mahsuldar icadiy muvafaqiyetler em de Yazıcılar birligimizniñ faaliyetinde faal iştirak etmelerini tileymiz.
 
Aynı şu toplaşuvda Romaniyada ana tilinde yazğan ediplerden dört adam: Güner Aqmolla, İbraim Neriman, Rustem Seitabla ve Çiydem Nargis de Qırımtatar yazıcıları Birligine fahriy aza olaraq qabul etildiler.
 
Qırımtatar yazıcıları birliginiñ idaresi