Milliy Meclis reisiniñ Türkiyege ziyareti.

MECLİS

Qırımtatar halqı Meclisiniñ reisi, Ukraina halq deputatı Mustafa Cemilev Türkiyeniñ devlet naziri Faruk Çelik türkiy halqlar cemaat teşkilâtlarınıñ vekilleri şerefine bergen resmiy ziyafette iştirak etti. 2010 senesi fevral 27-de İstanbuldaki "Grand Cevahir" ötelinde olıp keçken bu qonuşuv  yemegine Balkan, Avropa memleketleri, Orta Asiya ve Kavkazdan kelgen 2 biñden ziyade vekil qatıldı. Bu adamlar arasında cemaat teşkilâtlarınıñ yetekçileri, deputatlar ve nazirler bar edi. Bu aqta ziyafette iştirak etken Qırım haberler agentliginiñ baş koordinatorı İsmet Yüksel bildire.

Tedbir Türkiye Cumhuriyeti Nazirler Şurası yanında Çetelde yaşağan türklerniñ işleri boyunca departamentniñ meydanğa ketirilmesi munasebetinen ötkerildi.

Resmiy ziyafette qırımtatar halqı adından Qırımtatar halqı Meclisiniñ reisi, Ukraina halq deputatı Mustafa Cemilev, Meclis  reisiniñ mesleatçısı, QHA haberler agentliginiñ baş koordinatorı İsmet Yüksel, Qırımtatarlarnıñ Kiyevdeki yurtdaşlıq cemiyetiniñ reisi Arslan Ümerov, Qırımtatar halqı Meclisiniñ Türkiyedeki  temsilcisi Zafer Qaratay, İstanbuldaki qırımtatarlarnıñ medeniyet ve özara yardımlaşma derneginiñ başı Celâl İçten ve onıñ yardımcısı Melih Cilsim, Ğarbiy Avropadaki qırımtatarlarnıñ medeniyet ve özara yardımlaşma derneginiñ başı Rafet Qaranlıq, Milliy Meclis reisiniñ Avropa boyunca mesleatçısı Ahmet Yozay, Aqaradaki qırımtatarlarnıñ medeniyet ve özara yardımlaşma dernegi başınıñ muavini Murtaza Esenqal ve şu dernekniñ baş qaznadarı Mustafa Şahin, Bursadaki qırımtatarlarnıñ medeniyet ve özara yardımlaşma derneginiñ başı Adnan Süyen, Eski Şehirdeki qırımtatarlarnıñ medeniyet ve özara yardımlaşma derneginiñ başı Mesur Yor, Qırımnı inkişaf ettirüv cemiyetiniñ reisi Yumit Şilit, Qocaeli şeerindeki qırımtatarlarnıñ medeniyet ve özara yardımlaşma derneginiñ başı İbraim Vefa Aracı, Tekirdağ şeerindeki qırımtatarlarnıñ medeniyet ve özara yardımlaşma derneginiñ vekili Fatih Erge iştirak ettiler.

Tedbirde Türkiyeniñ Baş naziri Recep Tayin Erdogan iştirak etti. Qırımtatar halqı Meclisiniñ reisi  Türkiye Baş naziri Recep Erdogannen, Türkiyeniñ devlet naziri Faruk Çeliknen ve İstanbul şeeriniñ valisi Muammer Gülernen bir masa başında oturdı.

Tedbirni kiriş söznen Türk teşkilâtları birliginiñ reisi Nuri Güngür açtı, ondan soñ Almaniyada yaşağan türklerniñ vekili Mustafa Yener, Rumeliya (Balkanlarnıñ tarihiy adı) türkleri federatsiyasınıñ reisi Turan Gençoğlu, Türk-amerikan assotsiatsiyasınıñ reisi Qaya Böztepe, Qırımtatar halqı Meclisiniñ reisi Mustafa Cemilev, Azerbaycannıñ Çetelde yaşağan azerilernen çalışuv boyunca devlet komitetiniñ reisi Nazim İbragimov, Şimaliy Qıbrız Türk Cumhuriyetiniñ tışqı işler naziri Husein Yözgürgün, Kosovo Cumhuriyetiniñ ekologiya ve planlaştıruv naziri Mahir Yagcılar, Makedoniyanıñ devlet naziri Hadi Nezir, Serbiyanıñ devlet naziri Suleyman Okudan, Türkiniñ tışqı işler naziri Ahmed Davutoğlu, Türkiyeniñ devlet naziri Faruk Çelik ve Türkiyeniñ Baş naziri Recep Tayip Erdogan çıqışta bulundılar.

Mustafa Cemilev öz çıqışında cümleden, şöyle dedi: "1944 senesi qırımtatarlar zorbalıq ile Özbekistan ve Sibirge sürgün olunğan ediler. Kommunist rejimi yıqtırılğan soñ biz ana-Vatanımızğa qaytıp başladıq. Elbet, avdetimiz yengil olmadı. Vatanda yaşayışnı yañıdan qurmaq kerek oldı. Mında ögümizde bir çoq problemler kevdelendi, aq-uquqlarımız taptaldı. Mında qaytıp kelip, Qırımda türk-islâm medeniyeti yoq etilgenini, atta mezarlıqlarımız bozulğanını kördik. Şimdi biz bu ulu tsivilizatsiyanı, bu ulu medeniyetni ğayrıdan tiklemege çalışmaqtamız.

2009 senesiniñ mayıs ayında Birinci Bütündünya qırımtatar kongressini ötkerdik. Kongressniñ işine Türkiyeniñ devlet naziri Faruk Çelik de qatılıp, kendi iştirakinen qırımtatar halqına qoltuttı, bizim keyfimizni köterdi. Bunıñ içün er kesniñ ögünde oña samimiy minnetdarlığımıznı bildirem. Bundan ğayrı, Suleyman Demirelge (1993-2000 seneleri Türkiyeniñ Prezidenti -muarrir) teşekkürlerimizni bildirem. O adam Qırım içün yapqan şeylerni biz iç bir vaqıt unutmamız".

Mustafa Cemilev öz çıqışında Çetelde yaşağan türklerniñ işleri boyunca departamentniñ meydanğa ketirilmesiniñ müimligini qayd eterek, bu departament yardımınen pek çoq problemlerniñ ögüni almaq mümkün olacağına eminlik bildirdi.

Mustafa Cemilev öz çıqışında 1979 senesi kendisi şaat olğan bir vaqianı tarifledi: "1979 senesi meni Yaqutistandaki apske alıp kettiler. O vaqıt aps ekige bölüngen edi. Birisinde  yaqutlar, ekincisinde de ruslar tutula edi. Anda yaqutlarğa köre ruslar çoqça ediler. İşte, men yaqutlarnıñ bölüginde olmağa istedim. Yaqutlar böyle qararğa kelgeninden taaciplenip, bunıñ sebebini soradılar: "Sen yaqut degilsiñ de, ne içün biznen olmaq isteysiñ?" dediler. Men olarğa sadece insan öz tuvğanlarınen beraber olmaq kerekligini söyledim. Olar kene ayretlendiler. Men ise türkler yaqutlarnı öz qardaşları olaraq bilgenlerini, men de bir qırımtatar sıfatında türkiy halqqa mensüp olğanımnı añlattım. Biz türklermi, demek, biz epimiz qardaşlarmız. İşte, bundan soñ, yaqutlarnen dostlaştıq".